Velkommen til Stråleterapimøtet og MedFys 2006!

Velkomne til Ålesund!

Arrangementet er avholdt og omtalt i Sunnmørsposten

21.-22. mars går MedFys-dagane 2006 av stabelen i Ålesund på Sunnmøre.

Vi held fram med å leggje møtet til våren, og i år er det gjort nok ein vri, ved å halde MedFys i førekant av Norsk Stråleterapimøte. I tillegg er den totale tida korta ned, slik at begge arrangementa strekk seg over tre dagar totalt.

Ålesund fekk bystatus i 1848, og fram til 1904 var Ålesund ein ”treby”. I 1904, natta til 23. januar, brann det i Ålesund. Det gjekk med 850 hus, og berre 230 bygningar stod att innanfor bygrensene etter brannen hadde herja. Heile 10000 menneske mista hus og heim, og dei vart innkvarterte på stader i Ålesund der det ikkje hadde brunne. Seinare vart dei plasserte rundt omkring i distriktet. Berre eit døgn etter brannutbrótet, kom dei første hjelpesendingane til Ålesund, og allereie etter tre år var mesteparten av den utbrende bykjernen reist oppatt. Omkring 50 ulike arkitektar var med på å teikne ”det nye Ålesund”. Desse representerte ei stor breidde geografisk, og mange av dei hadde utdanna seg i utlandet. Slik kom også Jugendstilen, som byen er kjend for, til Ålesund. Difor også namet Jugendbyen.

Eit godt tips å ta med seg på ein rundtur i byen, er å løfte blikket! Då vil ein få med seg dei særskilde tårna og spira på bygningane, ”utskjeringane” og dei særskilde fargane som pregar jugend-arkitekturen.

Elles er det klippfiskproduksjonen som har prega framveksten til byen. Dette starta allereie i 1750, og vart etterkvart den viktigaste eksportartikkelen i fogderiet. Det vart knytt kontakter mot Spania, og ”Spansketida” varte fram til 1870-åra. Denne epoken var eit vesentleg bidrag til den økonomiske veksten i Ålesund ved midten av førre århundret. Seinare kom det som kallast ”Svensketida”, som gav Ålesund eit ytterlegare løft og gjorde Sunnmøre til eit pionérområde i norsk havfiske.

I dag er Ålesund ein by som pregast av fysisk opprusting og omfattande byggjeaktivitet. Byen framstår som moderne, med fleire kjøpesenter, restaurantar og kaféar.

Vi håper du får eit triveleg opphald i Ålesund, med godt fagleg og kulturelt utbytte.

For meir informasjon om Ålesund, sjå www.visitalesund.com

Venleg helsing arrangementskommitéen.